Душанбе. 24-уми декабр. ОИ «Азия-Плюс» - Корхонаи воҳиди давлатии «Ширкати алюминии Тоҷикистон («Талко») истеҳсоли алюминийро ба андозаи 10 дарсад коҳиш медиҳад.

            Тавре сухангӯи ширкат Саёҳат Қодирова ба ОИ «Азия-Плюс» хабар дод, иқдоми мазкур ба кам кардани истифодаи нерӯи барқ ҷиҳати таъмини аҳолӣ бо барқу гармӣ дар мавсими зимистон равона гардидааст.

            Ба гуфтаи ӯ, коҳиши истеҳсоли алюминий ҳамчунин ба иллати паст шудани нархи он дар бозори ҷаҳонӣ, ки ба он бӯҳрони молиявӣ боис шудааст, сурат мегирад.

            Қобили зикр аст, ки дар корхона сол то сол афзоиши истеҳсоли алюминий ба мушоҳида мерасад. «Соли 2007 истеҳсоли алюминий то 421 ҳазору 450 тонна расонида шуд, ки нисбат ба соли 2006 беш аз 5 тонна бештар буд ва соли равон то 427 ҳазор тонна расонидани истеҳсоли он пешбинӣ гардида буд», - гуфт С.Қодирова.