Душанбе. 30-юми июл. ОИ «Азия-плюс» - То имрӯз қариб дар майдони 200 ҳазор гектар замин кишти ҷумҳурӣ ҷамъоварии ҳосили гандум ба анҷом расид, ки ба 75 дарсад аз ҳаҷми умумии заминҳои кишти гандум баробар аст.

            Чӣ тавре ки ба ОИ «Азия-Плюс» сардори раёсати рустанипарварии Вазорати кишоварзии ҶТ Саидмурод Баҳриддинов иттилоъ дод, соли равон ҳосилнокӣ ба ҳисоби миёна 27 сентнер аз як гектарро (соли гузашта – 18,7 сентнер) ташкил дода, он дар баъзе хоҷагиҳо ба 50-60 сентнер мерасад ва то имрӯз зиёда аз 455 ҳазор тонна гандум захира шудааст, ки дар муқоиса бо ҳамин давраи соли гузашта 220 ҳазор тонна зиёдтар мебошад.

            Ба гуфтаи номбурда, ба ҷуз Вилояти Мухтори Кӯҳистони Бадахшон, дар тамоми минтақаҳои ҷумҳурӣ ҷамъоварии оммавии ҳосили гандум шурӯъ шудааст.